فىبحور الشعر شديت القوارب
قلت اعانـد موجهـا والشـك زايـل
من بغى الحكمه..ترى الحكمه تجارب
والتجـارب خيـر برهـان ودلايـل
كم وسيلـه بـررت سـود المـآرب
والمآرب غيض من فيض الوسايـل
لا تخلي الهرج حبـلٍ فـوق غـارب
في "ذلولٍ" وسمهـا " جـذعٍ ومايـل"
مابقـى "للبـدو" بالديـرة مضـارب
مابقى "بالذود" ..لا جيـش ورحايـل
في زمـانٍ فيـه ياشـح المشـارب
ماغـدا "للحـرب" يالفـارس بدايـل
رحت اجهز "سيفي" و"رمحي" واحارب
عـادة الجّـدان باوقـات الهـوايـل
ماحسبت حساب "لدغات العقـارب "
ماحسبت حساب "وش تحت النفايـل"
لو يخون الراي "عطران الشـوارب"
مايضيـع الطيـب بعيـال الحمايـل
آه..ياقلـبٍ شكـى طعـن الاقـارب
كم كسبت "ذنوب" باسبـاب الفضايـل
ولو يضيق الكون من شرق ومغارب
ماتضيق صـدور فرسـان الاصايـل